Udaan

Meri har kahani mein zikr hai mohabbat ka - 
Khud se rihai ka, hosla-e-afzai ka.
Kuch fasane rangeen hai, kuch gamgeen;
Taaluq is zamaane se kuch aisa ho chala hai - 
Uljhano ke dararon se rengati zindagi bhi lage haseen.

Firaq-e-yaar k dard mein lipte hue - 
Ye ashq jo teri palko mein thehre hain;
Bereham zamaane se khauf zada silwate tere chehre pe - 
In silwaton se behne ki raah dhoondhe hain. 

Kyu roke hai tu apne jazbaat apni hi awaaz mein;
Teri aankhon se bayan tere halaat-e-zakhm ho rahe hain.
Apne befikr andaaz pe jhoothi nakhwat dikhane waale - 
Teri khoii muskurahat tere dil afgaar ko benaqaab kar rahe hain.

Tu khud ko aazaad kar le us har khayal se -
Jo tujhe Khuda se juda kar raha;
Is do ghadi ki zindagi ko kyu tu khalish-e-dil ki -
Badqismat yaadon mein zaya kar raha.
Ye teri ibtada-e-fatah hogi - 
Tu apna naseeb yun khaak mein na udaa.
Kyu apne zakhmo ka tabiib gairon ki rahmat mein dhoond raha;
Mohabbat to teri ruuh mein basa, teri rago mein beh raha.